ԿԱՅԱՑԱՎ «ԴԵՊՐԵՍԻՎ ԽԱՆԳԱՐՈՒՄՆԵՐԻ ԲՈՒԺՄԱՆ ՈՒՂԵՑՈՒՅՑ»-Ի ՔՆՆԱՐԿՄԱՆ ՀԱՆԴԻՊՈՒՄԸ

2018 թվականի ապրիլի 4-ին ՀՀ ԱՆ «Ավան» հոգեկան առողջության կենտրոն» ՓԲ ընկերության նիստերի դահլիճում ՀՀ ԱՆ գլխավոր հեգեբույժ, ՀՀ ԱՆ «Ավան» հոգեկան առողջության կենտրոնի տնօրեն` տիկին Արեգա Հակոբյանի նախաձեռնությամբ կայացավ «Դեպրեսիվ խանգարումների բուժման ուղեցույց»-ի քննարկման հանդիպումը կլոր սեղանի շուրջ: 

Հանդիպմանը հրավիրվել էին հոգեբուժական բժշկական օգնություն և սպասարկում իրականացնող կազմակերպությունների տնօրենները և Մխ. Հերացու անվան ԵՊԲՀ հոգեբուժության ամբիոնի պրոֆեսորադասախոսական անձնակազմը: Հանդիպման սկզբում Արեգա Հակոբյանը ուղջունեց բոլոր ներկաներին, այնուհետև կենտրոնի գիտական գծով տեղակալ, բ.գ.թ.` տիկին Գայանե Առաքելովան ներկայացրեց «Դեպրեսիվ խանգարումների բուժման ուղեցույց»-ի կառուցվածքը, բովանդակությունն ու մշակման ընթացքը, նշեց. «Դեպրեսիվ խանգարումը դասվում է հոգեբուժության ոլորտի արդի խանգարումներին և ուղեցույցի մշակման հիմնական նպատակն է բարելավել դեպրեսիվ խանգարումներով պացիենտներին տրամադրվող բուժօգնության որակը՝ հիմնվելով արդի ապացուցողական մոտեցումների վրա, մշակելով դեպրեսիվ խանգարումների համալիր բուժման վերաբերյալ կլինիկական խորհուրդներ։ Սույն ուղեցույցը մշակվել է «Ավան» Հոգեկան առողջության կենտրոն» ՓԲԸ-ի մասնագետների կողմից և նախատեսված է դեպրեսիվ խանգարումներով պացիենտների բուժման շրջանակներում ներգրավված մասնագետների համար՝ հոգեբույժների, հոգեբանների, փսիխոթերապևտների, առաջնային օղակների բժիշկների»: 

Քննարկման ժամանակ մասնագետները ներկայացրեցին ուղեցույցի շուրջ իրենց տեսակետներն ու առաջարկություններն, ինչպես նաև, պարզաբանումներ տրվեցին ծագած մի շարք  հարցերի շուրջ:

 Հանդիպման վերջում Արեգա Հակոբյանը շնորհակալություն հայտնեց ներկա գտնվողներին և նշեց, որ. «Ուղեցույցի մշակման համար բավականին ծավալուն աշխատանք է իրականացվել և առաջիկայում դեռ մեծ աշխատանք է սպասվում, ուստի ցանկացած մասնագիտական կարծիք շատ կարևոր է»: